前嗰排全球第二大富豪、「股神」畢菲特宣布，將身家八成半捐畀5個慈善基金，當中八成三捐畀佢老死、全球首富蓋茨夫婦名下慈善基金。嗰頭全球兩大首富一齊捐身家，呢頭香港班富豪就畀老記問到口啞啞。首富李嘉誠嗱嗱聲話，自己捐嗰份都唔會少過財產三分之一。
至於同樣靠地產發達嘅富豪郭氏兄弟就話，呢啲係私人嘅事。好彩「唔講」唔代表「唔捐」，噚日新地郭氏基金宣布，設立「中山市扶困助學金」，由今個學年開始，每年資助廣東省中山市20名高考成績優異，但家境貧困嘅學生，喺大陸唔同嘅重點大學完成四年本科教育，呢個咁偉大嘅計劃為期七年。
幫助貧苦學生，等佢哋自力更生脫貧，點講都係好事，不過，硬係唔明點解啲富商咁鍾意喺大陸做善事，尤其喺大陸有大把生意嘅，唔知係咪華華多心呢呵！