地產代理呢行嘅流動性好大，好多新入行嘅經紀，都憧憬可以搵到好多錢，入咗行先發覺唔係呢回事，捱咗幾個月底薪頂唔順就走人。話雖如此，好多網民依然好奇究竟點樣可以成為一個年薪過百萬嘅經紀。
網友Michael321321開咗個題目畀大家，即時引嚟七嘴八舌嘅討論。佢問：「成為一個百萬年薪的金牌經紀，要具備甚麼條件?」
金老鼠話：「市道暢旺，樓價飆升。」
PaperMoonhe反駁：「我認為係運氣!」
LEMONBAN就話：「我覺得係做貴價樓，commission都高好多嘛!」
去邊度食晏好抵死咁話：「主要條件，面皮要夠厚!」
要識講大話
ieguard：「講大話，講到自己都唔相信嘅時候……就掂啦!」
wwwxx01總結一句：「得一樣，就係要識講大話，話畀人聽搵咗年薪百萬!」
網上咁多意見，不如睇吓中原、美聯兩間龍頭大行嘅實際數字。年薪百萬，即係月入八萬零蚊嘅經理級以下經紀，亦係前線代理，中原喺05年度就有19人。
至於美聯，就初步統計咗今年截至8月份嘅數字，暫時至少已有兩名經紀估計年薪可過百萬，其中一個係做舖位買賣嘅，另一個做山頂、南區嘅豪宅盤。網民LEMONBAN果然有見地。