油價漠視委內瑞拉及尼日利亞早前宣布每日共減產17萬桶之消息，稍為一彈便掉頭回落。紐約期油周一收市報61.03美元（1桶．下同），急挫3%，是兩周來單日最大跌幅。
鬼咩！油組（OPEC）都未出聲，汝等算老幾？就算跌穿60美元（看形勢大有機會）又如何？到55美元才七嘴八舌未遲，反正年來已撈到風山水起，腰纏萬貫，做個順水人情畀布殊，當交「保護費」都要啦！
金價好像預先知道油價必返轉頭，故率先「南下」，但步伐卻十分蹣跚。在不少大行或分析員轉軚指商品期貨已進入熊市（高盛除外）的呼叫聲中，還企得如此硬淨，真不簡單！投資者/讀者不必在黃金買賣方面爭朝夕，亦別要被坊間的轉軚高手搞到頭都暈埋，有多餘錢見低便買點可也。這類投資需要長期作戰，筆者早於6年前已建議買金，希望這「十年黃金夢」可圓，到時別忘記請冠一食番餐鮑參翅肚！
與油價和金價息息相關的美元，其強勢不無令投資者感到詫異。眼見數據皆反映美經濟明顯滑坡、樓市搖搖欲墜、經常賬赤字收窄無期、孳息倒逆持續（衰退之象）、減息之聲甚囂塵上，美滙仍屹立不倒，難道保哥仔一聲令下，真可力挽美元於既倒乎？
炒股今季要小心
油跌、金回、孳息低迷、美元不死，美股又走得去邊？故上周已出現準備慶祝道指破歷史紀錄的「嘉年華」，豈料一而再地一場歡喜一場空，然則已洗濕個頭，不繼續高喊努力、奮鬥，嗰班跟風的散戶又怎會最終亁亁淨淨離場？無論「十月效應」會否出現，第4季都將會令閣下驚心動魄。
5、6月都嚇你唔死？嘿嘿，走着瞧！！