06年頭3季樓市表現，簡直可以用差到冇人有去形容，地產商賣樓唔夠數固然頭痕，班代理對住業績盤數就更加頭痛，剩番3個月就年結，各行出盡法寶谷班手足跑數跑盡啲，當中千古不變嘅最佳獎勵，始終離唔開錢、錢、錢。
利嘉閣廖董話第四季嘅谷數銀彈政策，預計動用420萬，只要未來3個月做夠數就有額外獎金，而且屬於累進制，營業員以8萬銀營業額為目標，第1個月獎金500蚊，第2個月有1000蚊，第3個月加至2000蚊，即係連續3個月都達標可袋3500蚊過年。
至於組別經理，營業額目標就係40萬元，獎金分別係1000、2000同4000蚊，如果連中三元有成7000蚊，想攞足就唔可以斷纜。
獎金數額表面上唔算多，內在嘅激勵意義就大得多。