早前有小學提倡教師着衫打扮要有品味，其實學生日日上堂，見老師多過見屋企人，好應該問問佢哋嘅意見。原來學生要求唔算好高，但唯一要求係Miss唔可以唔化妝上堂，仲要日日着唔同衫，咁先至有新鮮感和令人醒神啲。唔通真係要轉學補習天王咁執到正？
記者：馬靜兒
攝影：楊錦文
Model：Cassie@umovie,Edmond,Carmen,Carie,Ting&Daisy
Make-up：HankerYeung@BeautySquare
Wardrobe：i.t.
Miss必遮黑眼圈
無人會喜歡《女王的教室》的真矢look，黑衫黑裙，加埋頭髮allback，都幾拒人於千里。綜合同學的意見，大家都鍾意Miss着裙喎，仲要化淡妝！不過Miss晚晚要備課，10個中9個有黑眼圈，所以一定要遮黑眼圈。金色加橙色的妝容看起來好精神，又唔會太搶，簡簡單單就可以。
＊金橙眼夠精神
1.以黃調遮瑕膏塗黑眼圈近眼頭位，用手指輕印。畫眉前先要知道標準眼眉長度，才可以畫條跟眼睛相配的靚眉。
2.先以金色眼影塗眼窩，再以橙色塗雙眼皮摺位。上眼線塗黑色，下眼線塗啡色，掃黑色睫毛液。
3.在顴骨位掃偏橙色胭脂，記得輕手啲喎！
4.塗上帶少許粉紅或紅色的唇彩。
傘裙最受歡迎
Miss唔一定要着直身西裙，傘裙就可以更活潑，如今年熱爆的balloon款。着恤衫都可以選領口有ruffles嘅，外加一件短袖紫色外套，營造簡單層次感。黑色鞋就最百搭，2吋至3吋高就夠啦！
＊束髮夠清爽
5.先將耳仔對上兩吋位置的頭髮束起，再將橡筋向後略為拉鬆。
6.拉起辮子，將辮子由下穿過頭髮中央。
7.以髮夾固定，用定型水將散開的髮尾弄得貼服。
＊Miss妝物
Shoplists
ettusais （25063180）
L'OREAL （25910022）
Sasa （28663198）
shuuemura （22657582）
阿Sir要眉清目秀
大部份學生都認為阿Sir最重要是外表亁亁淨淨，千萬唔可以蓬頭垢面。各位阿Sir，除了平日要洗亁淨塊面，唔好滿面油光外，仲要剃亁淨鬍鬚，得閒要拔去眉頭雜毛，令眉毛更清秀。你唔係李準基，唔使化妝，但遮遮黑眼圈都要啫！
＊修眉拔雜毛
1.用手指拉起眉毛，眼皮上的雜毛便會更清晰可見。
2.對鏡用眉夾把雜毛逐條拔走，拔前最好用熱毛巾敷一敷，令毛孔擴張，就無咁痛。
唔好打呔
恤衫西褲最穩陣，有時款式好一點的斜布褲都可以。着恤衫就避免打呔，因為感覺可以更親切。不用刻意穿跟西褲同色的鞋，黑色褲襯啡色鞋都得，但千萬別着波鞋。
＊Gel齊頭髮
３.將五毫子份量的wax塗在手掌，搓勻，記得手指尖唔好有wax。由後腦位置開始將頭髮摷起，讓wax能均勻塗在頭髮上。
４.手指蘸小量wax，於額前頭髮捽一捽，營造彈性。
你like老師點打扮？
IVE學生華華：Miss最好着傘裙，中長度鬈髮再配sharp色眼影。阿Sir就唔好凸晒鬚根同打呔，因為好嚴肅。
F.5學生Belle：Miss淡妝OK啦！長直髮，短裙或收身裙都可以。阿Sir唔好太潮，恤衫西褲就可以了。
F.3學生Nicole：Miss唔可好以唔化妝，阿Sir就唔可以烏wea。
F.3學生Yeung：Miss唔好噴香水，唔好太多飾物，最好日日唔同衫！阿Sir個頭唔可以gel到立立令！
F.3學生Michelle：千萬唔可以將化妝品全部撻上面。
F.3學生Glali：最唔想Miss厚妝，阿Sir就要亁亁淨淨。
