阿士東維拉喺今屆英超聯有超水準演出，頭7場聯賽攞到3勝4和，仲要做埋盤王；但當佢哋順風順水嘅時候，偏偏有打得好好嘅前鋒勞基摩亞可能全季打柴，唔通連個天都唔鍾意佢哋？
容易甩骱要施手術
話說喺今屆英超聯入咗兩球、現年20歲嘅勞基摩亞，自17歲開始個膊頭就有事，好容易會甩骱，而喺上周六踢完對車路士場英超聯之後，佢就舊患復發，情況嚴重嘅話可能要做手術。維拉領隊奧尼爾就話：「如果勞基要施手術，就要唞幾個月，對我哋嚟講肯定係沉重打擊。雖然我哋唔想冇咗佢，不過若然佢唔做手術就斷唔到尾，長遠嚟講影響仲大。」奧尼爾仲話，傷患呢味嘢好似傳染病咁，一個傷開，就會陸續有來。
如果勞基摩亞真係長唞，維拉前線就得番巴路士、安祖同埋艾邦拉荷3個前鋒，梗係唔夠應付漫長嘅英超聯，所以有傳奧尼爾諗住簽瑟頓返嚟。現年33歲兼且係自由身嘅瑟頓，係就係老咗啲，但勝在踢法多元化，除咗前鋒之外，仲可以踢中場同埋後衞，加上佢之前喺些路廸跟奧尼爾搵食多年，對該名北愛籍領隊非常了解，若然成事，我求大俠認為對維拉有幫助。
「查實奧尼爾又唔使咁愁嘅，事關巴路士幾好波，只要奧尼爾搞得掂佢，令佢喺球場上唔玩獨食踢團體足球，話唔定以巴路士夥拍安祖同艾邦拉荷，效果會更好呢！」