車人合一：全球2,000部　拆後座減磅谷218匹　車尾擺多部MINI

香港僅得10部配額嘅MINICooperSJCWGP特別版終於嚟咗香港，呢部由JohnCooperWorks改裝嘅MINI，拆咗個後座，馬力多咗48匹，車尾咁多位，不如放多部最新嘅單座開篷MINICabrio。

記者：鄭達基
攝影：周旭文
精品提供：MINIShop（27135164）

限量雙座GP車頂有編號

MINICooperSJCWGP特別版，絕對係MINI嘅終極特別版，淨係個Look一睇就知佢係唔好惹嘅一類，車身用咗專用ThunderBlue顏色、PureSilver車頂同埋ChiliRed門邊鏡外，仲加晒有咁惡得咁惡嘅跑車包圍，例如頭尾泵把連擾流器，加埋車尾隻大尾翼同埋又係專用嘅18吋大胎軨，呢啲咪叫惡到爆燈囉！佢仲有一樣嘢巴閉嘅，就係全球限量2,000部，而香港嘅配額則只有10部；嘩，得咁少，咪隨時想買都俾人買晒？

■真皮桶椅是RECARO出品，掟彎嗰陣都唔怕屁股「向左走向右走」。

■車廂鋪排跟普通版嘅差唔多，但錶板卻改換成深灰色設計，連指針都變成紅色。

■頭冚生風導入口加有GPLogo，身份一望就知。

■尾泵把跟雙出式尾喉，都係JCW為GP特別版度身訂做。

■特別為GP設計的巨型合金軨，樣子靚兼有實際熱功能。

■車頂上有專用的車身編號，全球2,000部。

拆咗後排　輕40kg

JCWGP特別版唔只個Look有型，原來連內裏嘅車廂同機械配搭都有改動，其中1.6公升Supercharger引擎經JohnCooperWorks調校，馬力及扭力輸出比普通嘅CooperS多48hp及30Nm，前輪制動亦改用16吋透氣煞車碟及紅色制動卡鉗，制動效能亦都加強咗。仲有呀，為咗令部車有更加好嘅表現，JCW仲幫佢嚟咗一次瘦身，包括將後排座椅拆除、減少隔音物料同埋改用鋁製後懸掛組件，重量足足輕咗40kg，配埋6前速手動波箱，0至100公里只係6.5秒，快好多喎！另外，前座就改用RECARO真皮跑車桶椅，連錶板都轉埋深灰底色紅指針，入面仲有埋限量編號㖭！

原廠MINI精品

想揸MINI之餘，又可以着得好有型？咁不如買番啲衫或者手袋等物品吖！其實原廠都有為MINI推出多款精品，梗有一款啱你㗎！