特首曾蔭權以打煲呔成為個人icon，呢個dresscode已經成為佢第二個名字。八方最近聽聞，理工大學有教職員投訴，話佢哋嘅大學醫療保健處嘅醫生，近排被上級建議全部要打煲呔返工，搞到有啲醫生好唔鍾意，覺得啲高層喺度擦特首鞋，佢哋覺得一打煲呔就周身唔自在咁話。
理大教職員協會同八方證實，佢哋近排都收到一個大學醫療保健處嘅會員投訴，話唔鍾意被迫打煲呔上班，𠵱家協會都喺度了解緊係咪迫佢哋一定要咁做，可能有啲跟進行動。
不過，知情人士同八方解畫，話其實理大醫療保健處員工總數只係有20幾個，其中只有男職員受影響，有主管近排向有關男職員每人送咗一個煲呔，建議佢哋鍾意就可以用吓，咁樣可以企理一啲，但唔係硬性規定佢哋必須要打，唔打都唔會有乜懲罰，所以都唔算擦鞋喎。佢仲話，教師都有dresscode，希望醫生都有，呢個諗法好正常。八方覺得，醫生打呔都已經得，理大醫療保健處又何必多此一舉？