唔知近期潮流係咪流行管理層大執位呢？10月1日就有東力實業新行政總裁廖開強上任，估唔到連怡和集團都要大執位，仲要一口氣三間公司齊齊執，唔通真係十五十六，唔執（位）唔舒服？
第一個係置地原總裁蘇兆明，出年3月退任，職務由怡和管理董事兼怡和（中國）主席彭耀佳接任。第二係牛奶原行政總裁方勵圖又話喺下年3月退任，新官上場嘅就係牛奶南亞區地區董事郭伯鈞。
最後係怡和集團董事總經理艾特．凱瑟克，佢又係同一日退任，職務就會由做咗怡和太平洋行政總裁短短一年嘅衛柏文．凱瑟克接任，佢仲獲派駐去新加坡履新，兼任怡和管理董事。其實艾特同衛柏文都只係互換職位，因為艾特會返嚟香港做怡和汽車同怡和太平洋嘅行政總裁。
新聞稿入面就淨係交代艾特．凱瑟克新去向，另外兩位蘇兆明同方勵圖，就提都冇提過，究竟係另謀高就抑或退休，華華下次見到佢哋一定會問明。