救護員「馬菲」見盡人間騎呢事，濫用白車對他來說已非新聞，不過今次遇上的貴客，教他忍無可忍。一名科技大學學生洗牙後流牙血，竟然也要打999call白車。馬菲上網痛斥該名大學生「讀屎片」，網友和應，並建議下次直接把學生送入青山。
被指濫用白車的科大生就讀二年級，上周六在校內洗牙後流牙血，即召喚救護車送院。應召的救護員馬菲不滿這名學生的所作所為：「呢一位流牙血嘅大學生，行得走得，上到車仲識坐識蹺起對腳，醜唔醜呀？」救護車把科大生送往醫院急症室治理，馬菲說：「講真，佢唔可以自己去睇醫生或者牙醫咩？用個腦諗吓啦，去到急症室，醫生可以幫到你咩呀？」
網友痛斥應送青山
網友pizzafai對於事件痛心疾首：「有冇搞錯㗎，流下牙血都要call白車，係咪讀書讀到short咗呀？唔好車佢入A&E（急症室）啦，車佢入青山啦！」據馬菲所說，香港地濫用白車個案相當普遍，經典案例包括「小朋友擦損」、「阿伯唔肯食嘢」、「阿婆好攰唔講嘢」，以至「阿嬸俾道門拍一聲嚇親」等等。
消防處救護員會主席屈奇安慨歎，這類情況已經見怪不怪，同僚只能無奈對待：「曾經有個人話肚痛，一日call幾次白車，濫用資源。我哋想採取法律行動，將件事交畀律政司研究，但結果係冇得跟進，因為好難證明佢真肚痛定假肚痛。」