證監會自從5月開始多名高層離職後，現在差唔多齊章。
噚日政府公布，財政司司長委任畢馬威會計師事務所前合夥人簡俊傑（PaulKennedy，圖），出任證監會執行董事兼營運總裁，佢會喺本月16日履新，任期3年。
連埋8月底委任何賢通、雷祺光及施衛民，分別出任證監會企業融資部、市場監察部及法規執行部執行董事，證監會嘅6個執行董事職位都名花有主。現時只係爭在新分拆出來嘅非執行主席，政府仲未公布人選。
今次證監請營運總裁，同上次唔同，上一任歐陽長恩，嚟自投資銀行界，今次呢個簡俊傑係會計師，佢之前喺畢馬威，主要服務香港、中國內地及亞太區嘅主要金融機構，有超過20年經驗。