「Madison's」係間紐約式餐廳酒吧，環境有格調，個Brunch好受老外歡迎。舖頭大部份侍應都係Talk英文嘅外國人，除咗Ryan，佢一畢業就喺呢度返工，一做就做咗3年，雖然話香港係個華洋雜處嘅社會，但同外國人做同事慣唔慣？「唔會唔慣喎，我好快適應到，相處得都幾開心呀。」正因Ryan係中國人，所以經常俾客人撩傾偈：「係呀，因為餐廳周不時得我一個香港人，所以啲客都會同我傾偈多，有傳媒搵我哋影相，多數都靠我繙譯喇。」咁有無客讚你靚先？「都有嘅，但我自己唔覺得靚囉，唉，早幾日先有個客叫我去箍牙，話箍完牙會好睇啲，我覺得好麻煩喎，咪算數囉，打工啫，靚唔靚都無乜所謂啦。」箍牙煩，都唔及遇着麻煩客煩：「有啲客人坐非吸煙區又想食煙，唔知唔識聽定點喇，其他侍應講英文叫極佢哋都唔郁，呢個時候通常會搵我做醜人，要我笑住咁趕佢哋過吸煙區，好煩㗎。」估唔到識中文，連醜人都要做埋。
記者：蘇振鵬
攝影：陳陶鈞
食客評分（10分滿分）
Madison's（25234772）
地址：中環夏愨道10號和記大廈地下
Brunch收費：每位$188
供應時間：11:30am-3:00pm