娛樂圈女星經常以性感打扮出席公開場合，但互聯網竟成為一些壞分子的作惡溫床，令一眾女星慘變受害者。近日有網站上載多位女藝人包括黎姿、郭羨妮、李彩華和陳慧琳等出席宣傳活動的短片，攝錄者刻意追拍兼大特寫她們的胸部及下身，行徑猖獗，黎姿和李彩華聞訊後均陷入極度恐慌。
圈中女明星不時需以性感打扮出席公開活動，穿泳衣或內衣行騷，均是宣傳及演藝工作的一部份，沒想到有不良分子竟以不雅角度拍下女星的短片上載至互聯網，情況更極之猖獗。近日本報發現有網站上載了多位女星數百條性感短片，受害者包括黎姿、陳慧琳（Kelly）、舒淇、李彩華、關之琳、郭羨妮、鍾嘉欣、楊思琦、Twins及容祖兒等，名單不勝枚舉。
李彩華喊驚
「好似變態殺手咁」
經記者觀察，攝錄者經常現身各大記者會及舉行花生騷的酒店或商場，以DV機近距離大特寫女星的胸部、雙腿及重要部位，獵取角度極之不雅。例如其中一條短片拍攝黎姿出席Moiselle時裝展，身穿吊帶低胸短裙的她坐下時，竟被人用鏡頭對準下身，明顯有意拍攝其走光鏡頭，其後她側躺沙發上拍照，又被人以高角度拍攝其胸部。至於另一短片中，穿泳衣行花生騷的郭羨妮和李彩華，也分別被拍下胸部及下身的大特寫鏡頭。Kelly義賣月餅走光的短片，點擊人次更高達33萬，成為最多人瀏覽的短片。
黎姿昨日得悉被網友上載不雅短片後，在電話中大表震驚，她說：「都驚㗎，但冇辦法，自己身為公眾人物，自己着衫已經好保險，一定會有內膽，短裙入面會着兩條短褲，着鬆身衫黐晒膠紙，一定有吊帶背心或者tubetop打底，但遇着呢啲立心不良嘅人，有時都避無可避，好唔希望呢啲片會受網友歡迎。」
至於李彩華則說：「好變態，勁驚，我知道有個網站專係放啲closeup女星某部位嘅相，原來仲有人成條片放上網，好恐怖，好似變態殺手咁，平日出席場合，有閃光燈就會留意到，用微型DV機影就睇唔到，惟有一見DV機盡量避，之前提主辦單位留意吓有冇啲人攞DV機影嘢，我都一定會打底。」
無綫感憤怒
「對藝人好唔尊重」
由於被拍攝女星中不乏無綫女藝員，無綫外事部助理總監曾醒明昨日接受訪問時，強調會對這些不良分子作出譴責，他說：「呢樣係好唔恰當嘅行為，刻意立壞心腸用唔恰當角度影女藝員，希望呢啲人自律。我哋今次對呢件事比較愕然，𠵱家網站太多，防不勝防，但我哋都要保護藝人形象，佢哋行catwalk表演至要着呢類衫，唔希望呢個場合之後仲有人攞呢啲片上網，咁對藝人好唔尊重。今次係一個經驗，今後藝員接job會同主辦單位深入了解，對來歷不明嘅入場人士要禁止拍攝。」
此外，早前出席電影《傷城》記者會的舒淇也被拍下彎身時胸前洩春光的短片，其經理人管小姐昨日說：「真係防不勝防，𠵱家手提電話咁先進，仲要搞到上晒網，咁做好冇道德，惟有自己防備吓，盡量做好安全功夫。」
採訪：林妃
