科技Y自澳洲返澳門，路經香港，經馬主N安排，與左丁山吃餐午飯，講吓投資情況。科技Y睇嚟年紀唔老，但原來二十年前已在中大教書，後來移民，約十年前回流，返香港觀察一輪，成立公司做資訊科技顧問，點知某次落標申辦一個政府項目，發覺同佢爭嘅，竟係佢嘅舊學生。佢回心一諗，香港成本咁貴，投標競爭極為激烈，標價低到無可再低，點會有錢賺㗎？於是過去澳門考察，發覺地方雖然小，人口不多，但正因人才缺乏，大有可為，於是搬竇過去澳門發展，十年下來，不敢話發達，但在旁人眼中，佢已非常成功。
科技Y話當今澳門空前好景，正因為太好，學生做荷官收入多過做硬件軟件工程師，少人入行，公司請人辛苦到死，正是求才若渴，電腦科技人才如果唔嫌人工較平，想做嘢嘅話，不妨到澳門搵工。事實上，澳門雖然話人少，內亦有叻人。科技Y話有一次某香港專家到澳門做presentation，揸住一粒晶片猛咁吹牛，滿以為澳門冇乜人識。小休飲茶之時，科技Y對呢位香港專家講：你粒chip已經係過時產品，我哋上網老早查過晒資料，你唔好以為我哋澳門人唔識，側側膊就過關。香港專家為之一窒，面紅紅，休息後再講，語調都唔同晒。
原來喺澳門做專家，有個大好處，就係好多時可以代表澳門出席國際會議，故此見多識廣，反而香港專家太多，未必有此機會。科技Y現於澳門如魚得水，唔恨返香港，因為澳門生活費用低，樓價便宜，生活比較安樂，隱憂就係賭場興旺可以維持幾耐？能否成功轉型成為東方拉斯維加斯，吸引大量高檔遊客，開會遊客，而唔淨係吸引到普通中國人到澳門賭一晚就鬆人。
馬主N話科技Y之見解有如虬髯客，知太原李氏真英主也，自己就東渡扶餘國，卒有所成。