神華（1088）係內地最大煤炭生產商，舊年6月以7.50元招股，唔夠1年升到最高16.85元，隨住商品價格由高位回落，神華股價近月亦拾級而下，噚日最低跌到12.10元，收市報12.54元，冇升跌。一啲高位上咗車嘅散戶，終於忍痛止蝕。
《香港討論區》內，喺14.15元上車、12.24打靶嘅網友系統設置大呻：「買正股都蝕到pk！……蝕$19xxx。他媽哥治。」縱橫家就認為：「神華好嘢嚟㗎喎……坐多陣嘛……呢啲民生物用股唔會衰得去邊嘅」。拉米亦認同：「就嚟冬天又要用煤，又可以做新股中煤能源嘅影子股。𠵱家放，記得見再低啲要入番。」
花旗上星期五發表報告，指神華增長前景溫和，估值昂貴，予該股「沽售」評級，目標價10.4元。事實上，神華預測PE12.53倍，P/B4.01倍，較兗煤（1171）嘅10.91倍同1.5倍為高，加上內地由9月15日起取消煤炭出口退稅優惠，對股價不利。不過，內地第二大煤炭生產商中煤能源擬於11月中來港上市，加上神華已跌到咁殘，有條件博反彈。日線圖噚日喺低位現陽燭錘頭，小時圖底背馳，有利短線投機，第一個目標13.50元，跌穿12.10元止蝕。
余文