恒基早喺97年投返嚟嘅大埔比華利山別墅地皮，第一、二期370幾間屋，02年中已經攞咗入伙紙，但之後個市唔係天災就人禍，推售計劃一拖就拖咗4年，到今年底終於有聲氣會正式開售。
臨近中秋，仲搞咗個迎月晚會宣傳吓，請嚟容祖兒同芳華十八表演。
所謂天災人禍唔係蘭西亂噏，03年沙士，全港樓房市場幾乎崩盤，可謂公認嘅天災；至於人禍呢？話說02年底恒基本來已經準備好賣樓，點知物業路口有幢村屋租客玩嘢，將間屋布置成殯儀屋，屋內放滿紙紮公仔，屋頂外牆就放棺材同符咒，凡買家去地盤參觀都要經過，認真大吉利是！
捱過天災人禍
個村屋業主仲無辜，間屋俾人咁搞法，仲使租賣嘅？卒之業主同恒基先後入稟法院，申請禁制令，一拖就拖到03年底。咁樣嘅人禍，真係得啖笑。