最近甚少蒲頭嘅民建聯立法會議員蔡素玉噚日有機會上電視，事關佢架價值100萬但用咗將近10年嘅老爺S320平治房車，行行吓車頭突然噴煙。好彩「蔡菜子」馬上執行安全三部曲，停車、熄匙同離開10呎遠，有驚無險。
事發喺晏晝時分，蔡菜子正開車去灣仔會展同朋友聚會，行到鴻興道近灣仔碼頭車頭突然噴煙。事後消防同佢講，架車嘅冷氣喉爆裂。蔡菜子同八方講，揸咗咁多年車都未試過咁嘅事，當時好驚架車會着火。佢之所以臨危不亂，全靠曾鈺成主席教路：「有乜事停車、熄匙、離開同報警！」曾主席梗係有晒經驗啦，前年佢又係揸架有10幾年車齡嘅300SE平治房車，響紅磡故障冒煙着火。
蔡菜子話佢一向重視安全駕駛，今次算係一次好好嘅經驗。八方問佢架車幾時買，佢話係97年底，即係香港回歸後買啦。至於幾多錢，佢話無謂講啦。根據運輸署登記資料，架車係蔡議員97年以公司名義買嘅，間公司係蔡議員同一名姓林股東合股，當年車價約110萬元。