本報上周率先披露謝霆鋒和張栢芝奉子成婚，霆鋒大方承認婚事，但對於太太栢芝大肚一事，從來不敢直認。昨日霆鋒在新城電台接受訪問，講到家中的一隻巨龜時，卻不小心漏了口風，默認栢芝有喜。
日前謝霆鋒和張栢芝在菲律賓秘密結婚，有報道指他們在馬尼拉西南面的歸來島以基督教儀式舉行婚禮。返港後，掛着幸福笑容的霆鋒直認婚訊，惜未有通知家人，觸怒了媽媽狄波拉，拉姑連日來以淚洗面，更透過電台傳話不肯認做了奶奶，不願承認栢芝是新抱。
不過霆鋒並未因為媽媽不高興而不講婚事，他昨日在新城接受薛家燕訪問大談其感人婚禮，之後更忘形地說漏口風，默認栢芝有喜。早前霆鋒往橫店拍攝《詠春》，將家中愛龜交予父親謝賢照顧，而四哥近日已將龜交還予霆鋒，霆鋒更引述四哥說話：「佢話照顧咗隻龜半年，養到肥咗一個碼，仲將佢屋企個屎塔撞爆。」有人向霆鋒表示初生嬰兒不可以跟烏龜同住，他隨即爽快地說：「係啊！所以𠵱家（指替他的烏龜）搵地方囉。」
怕不能交配
霆鋒不停接受各人的祝福，家燕姐更特別送上一對鴛鴦枕給細姪謝霆鋒，還叮囑他緊記夫妻十誡，霆鋒趣怪地說：「第四條要支持、唔可以支配，我以為係唔可以交配，嚇死我！我仲諗點解唔可以交配，唔可以交配咁我點算，原來唔係，我中文唔好。」
謝霆鋒引述今次跟栢芝秘密結婚，除了拉姑不開心，連栢芝家人都不太高興，霆鋒說：「我自己要同父母交代，但係我有老婆外父外母，我都應該同佢哋講對唔住。我想快刀斬亂麻，呢個係我唱片宣傳，唔係我結婚宣傳，總之我會盡我能力證明畀佢哋知道，佢個女冇揀錯男人。」
霆鋒結婚不通知雙方家長，原因是為了老婆仔開心，他說：「我想畀個surprise老婆，我唔叫自己父母，叫外父外母會有少少怪。」對於拉姑不肯認有新抱，霆鋒解釋說：「佢係鬧我，唔係對邊個講，唔係對Cecilia（栢芝）講。」
或組夫妻檔
提到生仔大計，霆鋒非常雀躍，問他婚後會不會謝絕夫妻檔，他滔滔不絕說：「之前接咗都會做，不過如果有奶粉、尿片、玩具、地產都唔錯，有人話幫我間間BB房仲好，我會sell得好好。」霆鋒難掩愉悅之色，再一次暗示太太有喜。
記者昨日致電四哥講恭喜，四哥以為記者「套料」，他說：「你唔使咁講，我話畀你知唔係，不過，有BB係遲早嘅事。」續問他是否已將龜交還予霆鋒，四哥說：「我畀番隻龜佢啦，但栢芝又送咗兩隻龜畀我。」拉姑的電話則駁到留言信箱，商台主持人查小欣稱狄波拉已離開香港，拉姑到達目的地後，二人曾通電話，但沒有再進一步談及兒媳之間的事。
此外，霍汶希（Mani）昨日到中環出席活動，對於霆鋒默認栢芝懷孕，她表示仍未聯絡到霆鋒，她說：「佢應該冇BB，佢講緊應該係將來，大前日先問佢，佢先話冇，冇理由一日之後就話有咗。」
採訪、攝影：楊潔雯
