常說名店售貨員現在只招呼自由行遊客，對本地客唔多睇得上眼。聽得多啫，左丁山好少行入名店，未有耳聞目睹經驗。呢日早上去完銀行，走出嚟見有空檔時間，於是做吓windowshopping，睇見中建大廈一間G字頭鞋店有一兩對波鞋幾合眼緣，於是行入去睇吓。三個售貨員掛住招呼四五個講普通話嘅遊客，為試鞋忙個不了，冇人望左丁山一眼，於是自己揀咗貨架上兩款減價（五折）嘅運動鞋試吓，試左腳之後，發覺大咗一啲，於是想問售貨員有冇細一號嘅，等咗五分鐘，都冇機會叫到售貨員行埋嚟，因為啲大客猛話：「一雙、兩雙、三雙。」買鞋買到不亦樂乎，人哋邊有時間招呼左丁山吖？好嘞，卒之有位小姐經過，捉住佢問：「有冇細一號？」售貨小姐一望，即答：「冇，最細係呢款。」跟住立即走開，左丁山唯有鬆人。順帶一提，呢間名店嘅女售貨員制服係流行嘅低腰褲配縮腰T恤，小姐們踎在地上為內地貴客（係男士）試鞋，上身向前微傾，T恤向上縮幾吋，低腰褲向下縮幾吋，你都諗到係乜嘢鏡頭啦。遊客睇到騎騎笑，古老人會覺得啲售貨員蝕底咗喎！
行出鞋舖，碰到導遊C，講起呢啲事，導遊C話：「唓，人哋女售貨員鍾意趕上潮流啫，你咪咁古老啦。𠵱家做售貨員，要有急智先至唔會得罪大客。嗱，置地廣場內有間大名店G，一位內地大款某日與太太駕到，從荷包內拎一大疊銀紙出嚟，對老婆講：應該夠你用。然後行開坐喺另外一張梳化上。兩分鐘後，呢位先生竟然一個大字咁倒在梳化上，有失觀瞻到極，如果你係售貨員，點樣叫佢起身坐番好而唔得罪佢呢？要知道，佢老婆正在狂掃貨，千祈唔好趕走佢。」
嘩，要IQ高先至識得，左丁山咁笨，諗唔到。導遊C話：「咁你就唔夠G牌啲靚女醒目咯。一位售貨員立即沖咗杯熱咖啡走埋去，輕輕拍佢一下，細聲問：先生要奶定要糖，本店請你飲咖啡！大款唯有坐起身飲咖啡，問題咁就解決咗！」