Game事撻：日本百人排隊5小時　《寵物小精靈》到港炒上$2,500

用「望穿秋水」嚟形容鑽石/珍珠版《寵物小精靈》可謂非常貼切，皆因任天堂足足四年冇推出過系列新作，搞到班忠實擁躉餓到發晒癲，所以喺未推出前經已殺聲震天，有人豪言無論賣幾銀都會照樣科水！結果一如所料貨源不足，特別版主機連兩隻Game及成Set贈品公仔，叫價二千五依然有人入市，喺燒錄卡（盜版）當道嘅市況下走勢強勁，證明好嘢自然有人識欣賞！
文：陳福榮
攝影：陳盛臣

鑽石版稍貴

有相熟遊戲店老闆通知，淨Game喺日本正式發售前已流入本港，上周初嚟甫到曾一度炒過$400，但仍熱賣，Game舖眨吓眼日賣近百隻，直至𠵱家代理返大貨先穩定落嚟。此外唔少人對鑽石版情有獨鍾，所以相比起「珍珠版」平均會貴$10至$30，但相信遲啲玩家想儲齊兩版本怪獸，珍珠版就會升值。
至於內側採用略帶金屬色嘅特別版主機，由於同一般黑機有些微分別，加上外殼嗰兩隻有型神獸，結果第一日喺香港賣到成$1,580，到𠵱家就回落$1,450「較合理」水位。

■印有金銀色兩大神獸嘅特別版主機，唔只整得靚仲有濃厚炒味！

■特別版NDSLite連盒面同盒底都重新設計。

■兩個版本遊戲已回落至三百多元合理水平。

日本限定版公仔一樣炒

只限日本預約嘅特典公仔炒得仲勁，除咗鑽石同珍珠神獸外，要訂齊兩個版本先會送埋彥猴畀你。外面盛傳各大批發晨早扣起啲貨，因此出現單賣全Set三隻公仔$500嘅盤口。嘩！雖然係名廠海洋堂生產啫，都唔使賣到咁貴㗎？

尼杜

樸查

玩盡NDS機能

由於《Pokemon》足足出咗10年，玩法已難有大突破，都係養隻小精靈周圍同人戰鬥。好彩今次平台係仲未被完全發掘嘅NDS，至少可應用雙畫面同TouchScreen嘅點子。先講玩筆，跟《FF3》一樣用可以齋用筆玩，但系統冇咁複雜因而更得心應手；畫面方面亦靚過舊作，唔再係求其「Pixel畫」了事。再者亦對應支咪，等大家可以同其他玩家ChitChat一番啦。
有一點必定要同大家講清楚嘅，就係佢對應番GBA嗰幾集嘅儲存資料，只要達成指定條件就可每日傳送六隻過往嘅小精靈去鑽石/珍珠版度。但留意隻Game係跟真實時鐘嚟玩，有人試過改咗個鐘就要等多24小時先可以傳送，故此最好都係畀啲耐性，免因小失大。

彥猴

■基於雙畫面兼且可用TouchScreen，操作上有着更多變化。

■唔想齋同人隻抽，都可以用無線通訊功能同朋友齊齊冒險。

■機能進化關係，畫面同介面已經靚咗唔少。

■喺PokemonCentre有好多對手等住同你挑機。

日本排隊排成朝

每次《寵物小精靈》有新作見街，日本各大型連鎖店例必大排長龍，今集「鑽石/珍珠版」係自GBA「紅藍寶石版」後嘅正統新作，並非翻炒貨色，加埋部主題特別版NDSLite，想唔搶手都幾難。
由於特別版只喺專賣店PokemonCentre發售，因此未開舖已出現過百人龍，至少要等5粒鐘！至於新宿Yodobashi呢類大舖亦同炒到飛起嘅《FF3》相差無幾。單係發售首日，兩個版本已賣出共一百萬套，破盡NDS紀錄！