做過沙田政務專員嘅煲呔，一向覺得地區專員嘅角色好重要，視為政府同地區搭橋嘅人，幫政府喺地區收風，所以上任特首後一直好想放權畀民政專員，希望放啲好馬落去做呢個位，所以以前係籮底橙嘅專員職位，已經變成咗升官位；係明日之星，先可以做到㗎。
最新一個前途無可限量嘅政務官，肯定係教育統籌局前首席助理秘書長林聖傑，事關佢今日起就會接任馮浩然出任離島民政事務專員。林聖傑係乜水？查實佢喺98年先加入政府，曾任職高級政務主任、庫務局首席助理局長等。03年4月被調去教統局，管理成50億嘅持續進修基金；資歷咁淺就被委以重任，反映政府幾睇重佢。𠵱家佢仲接埋呢個升職位嚟做，前景唔使講都知係一片光明啦。