德育培訓課程噚日舉行總結典禮，有音樂劇、舞龍、太極及自衞術表演，算係冇乜冷場，其中香港音樂神童沈靖韜嘅演奏同對答，更係八方心目中嘅全場高潮所在。話說沈神童一埋位，就好忘我咁彈出一首成八分幾九分鐘嘅德爾遜名曲──《如歌的行板及激動的急快板》，八方對古典音樂認識唔多，但見佢彈指之間速度準確，音色清脆，真係令人拍爛手掌。
之後佢同司儀車淑梅講今日冇練過琴，𠵱家算係練咗幾分鐘；佢平日練琴少則練個半鐘，比賽前就一日成五、六個鐘。問佢有幾多套表演時着嘅踢死兔，佢就話𠵱家啱着嘅只得三套，唔啱着嘅就有十套，引到哄堂大笑。神童都會長大，成日咁細個咩？沈媽媽記住同佢添裝嗱！