英超球隊熱刺終於4場聯賽冇贏過之後，周日憑一球問題12碼擊敗到訪嘅樸茨茅夫，總算為領隊祖爾減減壓。不過有睇場波嘅球迷，都知熱刺入到第2球都係靠中場索高拿禁區內嘅「超插水」博到12碼所致。
球證為錯判道歉
講開嗰球問題球，就睇到我求大俠火都嚟埋，睇見老樸嘅中場柏度文廸斯掂都冇掂過索高拿，後者就突然自己「慣低」，球證仲要同旁證商量咗再決定判罰12碼，你哋點睇嘢㗎？不過賽後個球證就衰唔晒，直認自己判錯咗，佢仲有同老樸嘅領隊哈利列納道歉㖭。
但熱刺領隊祖爾就乞人憎咯，佢為咗贏波保住個飯碗，竟然擘大眼講大話，喺度狂撐索高拿冇插水，仲話應該係罰12碼！人哋球證賽後都承認衰咗啦，你仲要死撐嘅？祖爾你唔係為咗贏波就乜都噏得出嘛？呢啲咪叫做贏波但係輸晒風度囉！
我求大俠建議英格蘭足總最好實施新政策，喺球賽進行期間遇到啲爭議性嘅問題球，好似12碼或者有球員批踭咁，最好就睇番即時重播，場波一來公平啲，執法都有水準啲嘛。希望足總方面會翻睇錄影帶，見到索高拿嗰啲插水動作之後再秋後算賬，呢啲咁冇體育精神嘅嘢，最好梗係罰佢停賽啦！
「好多球迷都覺得球證嘅誤判都係比賽嘅一部份，呢點又確係無可厚非；之但係如果場波可以喺最公平之下完成，我諗對賽雙方都好願意睇番即時重播嘅。」