10月第一個交易日，係時候總結吓孫柏文隻金手指，為大家篤嘅貼士，喺第三季嘅表現。可以用以下八個字，「油銀受壓、熊證被殺」做總結。
以下個表，可以清楚顯示啲成績。跟住會講吓我對啲貼士第三、四季嘅展望。
先講世界大勢，第四季應該會見到花旗國樓市爆煲速度加快，聯儲局相信好大機會出年第一季減息，開啓印刷機，瘋狂印銀紙，跟住將新印嘅銀紙「水浸全世界」。究竟啲錢會唔會流入我哋特區股市？我真係唔知，不過可以肯定，聯儲局如果真係開始減息，去挽救因樓市爆煲嘅疲弱經濟，通脹一定會加劇。
強力買入白銀
到時候，冇人會出於「貪念」，覺得金、銀會升而走去買，到時如果買，係出於「恐懼」，覺得美元同其他紙幣購買力會冇晒，為求「保值」去買金銀。出現呢種恐懼嘅一刻，亦代表金銀進入大升市，情況有如七十年代一樣。到時，就要睇聯儲局，究竟有冇好似當年八十年代初嘅政治勇氣，將利息推到18厘。不過，孫柏文相信，呢個情況應該會喺第四季之後先至出現，所以嚟緊嘅三個月，大家唔需要「恐懼」住。以下就係我提供嘅三個投資建議，喺第三季嘅表現。
恒指熊證6204：7月5日，我建議大家買6204呢隻「恒指熊證」。當時，我話過，相信恒生指數已經喺2006年見頂，喺7月3日之前，恒指最高見過17300點，如果冇推斷錯，指數去唔到17500點呢個「熊證莊家通殺價位」。
不過，到8月17日，恒指升穿17500點，6204被「判處斬殺」，即時強制回收。大家如果有跟我建議，喺7月5日買6204，因為入市價位應該係$0.29，而到達強制回收日，6204嘅莊家就每證「回水」$0.0974，所以跟我建議就會輸66%。市場已經證明，我當時嘅推斷錯咗，原因喺花旗國樓市爆煲速度快到嚇親聯儲局，所以由7月開始，市場覺得加息周期會完結，個市就係咁升。上星期五收市，恒指報收17543點。熊證6204呢個貼士嘅表現，就有如我喺第二季叫大家買花旗國國家足球隊做世界盃小組冠軍嘅表現，真係好差勁！
白銀：又再次大上大落，由最高見過13美元，不過5個交易日之後，就被打壓到10.46。我亦喺9月18日第三次叫大家買白銀。作為「白銀文」，維持原本建議：強力買入。
中石油：7月之後窄幅上落，我仲係好鍾意中石油，目標價仲係$9.8。不過，我都要承認油價「不尋常」疲弱，有如03年伊拉克戰爭之後，中石油可能會喺第四季考大家嘅耐性。維持原本建議：強力買入。