由華置（127）聯同市建局合作發展嘅灣仔新盤尚翹峰，喺上個禮拜五（9月29日）正式開賣，聽聞發展商對呢個盤充滿信心，所以絕對不會仿效其他行家「劈價」嘅做法，並多番強調「求價不求量」。尚翹峰首批單位平均呎價係6451蚊，發展商講到明稍後會分階段逐步加價。小市民又點睇呢個盤呢？
abcpqr在《香港討論區上》，劈頭第一句就話︰「灣仔區開到咁貴，真係博封盤咩？大家都識貨比貨，畀到咁嘅價錢，真係有好多更佳選擇。」
網友violetｍan隨即和議︰「閣下言之有理，畀得$6000-$7000呎，不如買半山區或般含道D樓，起碼是傳統半山保值區，空氣質素也較好，樓的密度也唔會太高！灣仔樓毫無疑問比新界樓保值及抗跌力較高，但$6000-$7000呎，個人而言就太貴喇！呎價$4000-$4500比較合理D。」
tommytommy12345同樣認為定價過高︰「𠵱家個價一定唔係用家價，要睇吓多唔多炒家入市囉，如果無，應該可以減10%。我覺得$4500-5200呎比較合理，尤其係景觀差嗰d單位。」
樓下是街市
onoshinyip則指出︰「最大8百幾呎，折完再折得5百幾呎，扮到好似豪宅咁，樓下重要係街市㖭……。」
提起尚翹峰毗鄰街市，網友紛紛講笑，richardli好抵死咁話︰「Nola，豬肉榮，生果陳同賣菜婆大把錢，隨時做你neighbor，買餸重有delivery！」
綜合多位網友嘅意見，abcpqr得出咗一個結論︰「呢個盤真係要留待有心人買囉！」
正所謂當局者迷，唔知發展商聽到咁多「局外人」嘅聲音，會唔會有新嘅啓發呢？
報料電郵：[email protected]