霆鋒同栢芝閃電結婚唔話畀阿媽拉姑知，激到拉姑死死吓。原來唔止霆鋒同栢芝率性而為咁前衞，國家領導人曾憲梓位二公子曾智雄原來都好自我，佢噚日接受港台阿淑梅姐訪問，就自爆同曾家二少奶吳嘉寶分居時，都冇話過老竇知。
早排以吳嘉寶之名登報嘅一則啓事，引發全城競猜誰是楊小姐，事件中嘅男主角曾智雄噚日接受港台節目《開心日報》訪問，講番呢段18年嘅夫妻緣份，語帶惋惜咁話：「呢個世界乜都會變：時間會變，社會會變，人都會變。所以有時好難講，緣份係睇唔到摸唔着……」
佢承認呢位分咗居嘅老婆「搞咗個大頭佛出嚟」，令到屋企人好唔開心，但兩人冇傾過偈，淨係透過電郵聯絡。至於全國人大常委曾憲梓嘅反應，曾公子話：「爹哋冇乜反應，佢問開先知我哋兩夫妻分開咗，我估佢老人家呢兩年都感覺到我哋婚姻唔愉快，但我冇正式通知佢，我希望所有手續搞清楚先話佢知。」
曾公子仲話，佢淨係識楊采妮一個楊姓女藝人，食咗餐飯就識咗，但後來無下文；佢朋友提起競猜邊個係楊小姐，佢仲講笑話：「不如做莊收晒佢，實贏嘅，因為唔使賠，冇呢回事點賠呢？」