期指結算及季結後的港股仍會受外圍股市帶動，昨晚花旗股市如果再跌，港股今日會輪到淡友威，不過，上個禮拜五一戰，反映好淡雙方旗鼓相當，一時之間，仍然難分勝負，未有大方向之前，高位減持，低位收集，睇嚟係穩陣嘅策略。至於炒期指同窩輪，就要留意吓即市挾倉嘅活動。
好淡對攻，要搶奪有利嘅橋頭堡，等機會攻陷對手陣地，借助主要恒指成份股嘅力量係必不可少嘅策略，滙控（005）同埋隻中移動（941）係需要時時留意嘅股份，從技術走勢呢方面嚟睇，中移動嘅勢明顯較好，會係好友頂住個市嘅主力。
中移動C輪4903：中移動係第3季推高大市嘅火車頭，股價由40元邊推上，最高見56.70元，雖然上個禮拜見大陰燭下跌，但好快喺10日線搵到支持，掉頭回升，初頭都驚佢發展「破旗」走勢，不過，上個禮拜五表現一幕低位拗腰，難度極高，如果班好友要穩住個市，甚至推個市上去，中移動有機會再試56.70元高位，啲中移動C輪係時候留意吓。
隻中移動C輪4903上日報收44.5仙，係成交較活躍嘅中移動輪，槓桿率12.4倍（有效7倍），仲有133日期，溢價8%，算係合理，引伸波幅30.6%，輕微價內，對沖值0.565，正股升上56.70元，4903應該會炒上53仙樓上，中移動炒上，大多數都會推高引伸波幅，輪價嘅升幅應該會更大，正股跌穿54元止蝕。
俊樺