代表香港遠征南非無家者世界盃嘅曙光足球隊噚日凱旋歸來。呢支由露宿者組成嘅神奇球隊，爭取到全球排名44嘅成績，仲擊敗咗挪威、奧地利等勁旅，大炒美國隊11比3，成績都算唔錯。隊長阿龍話，最難忘係對阿根廷嗰場，喺最後一分鐘先迫和，最後輸12碼，無緣晉身總決賽。
阿龍話最初以為班外國球員個個咁高大，一定唔夠人哋咁勁。好彩一班隊員努力堅持，證明咗香港足球員即使硬碰非洲強隊，亦一啲都唔輸蝕。阿龍又話，最初睇見有啲隊友平時懶洋洋，估唔到落到場就鬼死咁搏，跑到冇氣都要堅持照跑落去。呢隊由八個露宿者組成嘅曙光隊，個個球員未出發踢世界盃就經已搵到工做，相信佢哋好快可以成功脫離露宿者行列，重獲新生。