高陽科技（818）上星期三停牌，宣布以溢價逾5%，即每股1.50元發行1億股新股，認購人來頭唔細，包括嘉里（683）董事長郭鶴年同埋OZManagement旗下三個基金。
今次已經係呢間公司年內第3次集資，之前分別透過旗下子公司發行可換股優先股予OZ在內兩組基金，另於3月以每股1.46元（1拆4前）配股予金融及電訊業人士車峰。
呢間公司前身係從事建築嘅粵海建業，由現時大股東渠氏入主後搞資訊科技，包括自動櫃員機等，公司股份平日成交唔多，上周五復牌升4.9%，收1.48元，成交只得200萬股。
但睇番股價走勢就嚇一跳，去年底股價只不過是0.32元，至今升幅達3.6倍，但升咗咁多都有大孖沙睇中，肯用溢價攞貨，莫非公司真係咁好賺？集團去年轉虧為盈賺6230萬元，往績PE30幾倍，今年上半年純利4222萬元，相信要睇埋全年業績，先知佢係咪真係有寶。
藍頓復牌看好
配股唔使點折讓，唔止呢一間。藍頓國際（245）上星期四停牌涉先舊後新配股，以0.188元配售8.3億股，較停牌前僅折讓1.6%。
據聞今次會配畀6個基金，包括MartinCurrie、花旗集團為主要股東嘅Asiastar及Invesco等，集資搞電視直銷同零售業務。有大芬肯咁細折讓接貨，復牌股價表現應該唔會差。
歐陽風