所謂寧食開眉粥、莫吃愁眉飯！「CafeMarco」搞Buffet，客人個個笑到嘭嘭聲，攞住個Pizza滿場飛嘅女部長Asuki話：「食得Buffet嘅都係開心人，唔開心又點會大喫一餐呢？」尖沙嘴係旅遊區，老外、本地客一半半，我發現好多老外都鍾意捉住Asuki搭膊頭影合照，覺唔覺得自己靚女？「OK喇，不過好多外國人話我個樣幾有中國味。」講得謙啫，據知酒店好多出國觀察交流團，都係搵Asuki做親善大使，精通多個語言、成日笑笑口，梗係冧死客啦。咁有無人影合照手多多先？「基本上啲客都好禮貌，都無手多多嘅。如果遇到類似情況，酒店有指引，要好有禮貌咁退半步避開，但唔可以令客人有唔舒服感覺。如果問題嚴重，可以搵其他男同事頂住。」吓？俾人抽水都只可以後退半步咋？慘啲喎。
記者：朱崇德
攝影：陳偉強
士多啤梨拿破崙
我個人推介，餅皮夠脆士多啤梨夠香甜，顏色靚到絕，嗜甜女生一定要試。
香芒蟹肉
必食！鮮蟹肉拆絲加酸忌廉配鮮嫩芒果肉，唔Heavy一啖一個，做醒胃頭盤啱數。
香煎燒烤醬牛油魚
牛油魚滑到好似綿花咁，醬汁加入西柚同檸檬汁，BBQ做法好香口。
食客評分（5分滿分）
「Asuki個樣我畀8分，每次嚟親佢都笑笑口，畀多2分，所以係滿分。」
「幾靚女吖。頭先我想食片皮鴨咁啱無晒，佢居然記得，一新出就攞到我面前，9分抵畀啦。」
CafeMarco（21133912）
地址：尖沙嘴海港城馬哥孛羅酒店1樓
自助餐供應時間：6:30pm-11:00pm
收費：周一至四成人$278，小童$178；周五、六、公眾假期及前夕成人$308，小童$208
