流行音樂感染力勁，連嚴肅聖潔嘅大教堂都要借助。今個月15號，紅爆全球嘅愛爾蘭搖滾樂隊U2主音歌手Bono，將會入侵香港中區聖公會聖約翰座堂，帶領破天荒嘅「U2主日崇拜」，信教又好，唔信都好，任何人士都可以參加呢個咁有創意嘅宗教界同音樂界嘅crossover聚會，費用全免。
其實，八方咁講可能誇咗些少，所謂「U2主日崇拜」，不過係當日主日崇拜唔播聖歌，改播U2嘅流行曲作品，Bono得把聲，佢個人係唔會出現嘅。大家會唔會即刻諗起好耐之前嗰套電影《修女也瘋狂》呢？冇錯，座堂發言人話，佢哋係首次喺教堂安裝大型音響系統，以搖滾音樂配合聖祭禮儀。
U2主日崇拜嘅另一個目的係響應「世界脫貧運動」，到時會義賣公平貿易產品，為多個慈善組織募捐。Bono母親係新教徒，父親係天主教徒，佢就形容自己係「騎牆派」。點都好，八方都好想喺教堂裏面聽吓U2嘅歌，但係就驚住到時要好似盂蘭節輪米咁，皆因座堂方面唔打算預先派飛，到時座位先到先得。