去年11月向金管局請辭、今年2月加盟星展集團嘅葉約德Amy（圖左），10月1日到星展（香港）履新做行政總裁，接替9月底退休嘅蘇禮文（圖右）。
星展8月底宣布有關消息後，9月旋即同蘇禮文搞歡送會。聽講，歡送會係喺中環嘅星展總行下面嘅分行搞，好多高層人士都有畀面出席，包括集團副主席兼執行總裁戴國良、星展香港主席Frank黃鋼城（圖中）等。
歡送會除咗例牌由管理層致答謝辭之外，仲特登播番由蘇禮文粉墨登場表演跳舞嘅video，惹來全場歡笑聲，Frank同Amy都俾呢位58歲嘅銀行家搞到忍俊不禁。
雖然蘇禮文9月30日正式退休，但係聽聞，佢退休前還不停公幹四處飛，而且為咗使交接工作順利過渡，仲答應留任至第四季。似乎佢要到出年，先可以去法國，開展其銀髮一族嘅退休生活。