啱啱入秋，大閘蟹開始殺到埋身，甚麼花蟹、肉蟹馬上失寵淪為二奶仔，「雲陽閣」李淦莊師傅話：「傳統老饕嫌頭圍膏肉唔夠肥美，多數會等多陣先嚟個『秋後決』喫原隻大閘蟹。」咁𠵱家呢？就最啱拆蟹粉，猛火爆一爆、翅湯煨一煨、蛋白花雕蒸一蒸，簡直係嚴刑迫供……大家手上一對水火棒已經等咗成年，點忍？無得忍，開餐喇。
記者：朱崇德
攝影：譚盈傑
先嚟杯四川八寶茶
一入「雲陽閣」，即時俾個古色古香嘅長嘴銅茶壺吸引，心諗花巧嘢啫，點知侍仔即刻同我焗番杯正宗四川八寶茶，裏面有冰糖、合桃、杞子、黑提、陳皮、花旗參、紅棗、香片，唔……甜甜哋醒胃又提神，爽！睇落好似細微細眼無乜大不了，但就畀到你招呼殷勤可以慢慢Hea嘅感覺，之後食飯點菜，一切轉作慢板，幫襯過唔少酒樓食肆，就係少咗呢種閒適感。
雖然未到中秋，但行街已經見到唔少蟹店玩緊大殺價8至10隻賣$100，心諗今年有平蟹食，李淦莊師傅馬上指住我個話頭：「儍仔，今年大閘蟹價錢同舊年差唔多，上等靚貨大概三百零蚊斤；不過今年到港靚貨唔多，你見到嗰啲8至10隻賣$100嘅所謂大閘蟹，應該係濫竽充數嘅毛蟹，甚至係南方養殖嘅大閘蟹，由於天氣唔夠凍，肉地散啲無咁好膏。今年上等靚貨，批發會守得好緊，只會分畀大酒樓同老字號大閘蟹店。」講咁多都係想𠱁人上去幫襯啫，不過你出口術，我受，因為蟹菜確實好味。
1.蟹粉火爆明蝦球$220
6両大閘蟹拆埋成両半蟹粉精華，一嘢放落鑊同大蝦球猛火喪爆！季頭蟹肉蟹膏較削，用蝦嘅鮮美幫蟹粉提提味，味道夾到暈。記得食埋一條條嘅上海年糕，完全吸收晒多出嚟嘅蟹油，真係一滴都無嘥。
2.蛋白太雕蒸大閘蟹每隻$220
蛋白快熟，做到蛋滑兼蟹剛剛熟，有難度！蟹膏、肉汁流晒落蛋白，味鮮甘香入口仲滑過豆腐花，花雕酒淋面香到震。
3.蟹粉酥盒$180
蟹粉炒肉鬆，好多地方都有，呢次特別在用川式饃饃做夾盒。甘香芝麻放面，餅底薄而香脆，完全自家製，第二處無得食；蟹粉炒得勁香滴汁不漏，仲加入黑醋，健康又唔膩。
4.蟹粉小籠包每隻$16
一籠一個獨立蒸，包皮薄到透明，睇到裏面嘅蟹粉肉湯啷吓啷吓，每隻平均有5錢蟹粉，一隻蟹拆肉整得到嗰3個，平到每隻$16勁抵。
5.蟹粉鮑貝炒粉皮$180
蟹粉加鮑貝同樣取其鮮，不過味道比大蝦球清淡些少，唔會喧賓奪主。粉皮一樣有吸味作用，而且入口煙韌，好鬼有咬口。
6.酸辣蟹粉海皇翅$180
蟹粉海皇翅就食得多，但加入川菜嘅酸辣湯又幾新鮮；蟹粉多到浮晒上面，湯底又辣辣哋勁惹味，喜歡味濃者必試。
7.鮮蘇葉蟹粉煮豆腐$180
用豆腐煮蟹粉，唔少酒樓都會咁做，師傅用心在加入蒸大閘蟹必落嘅紫蘇葉，切幼絲燴埋一齊，好處係去一去蟹身的寒涼，夠細心！
食客有Say
Irene：「影相嗰陣，坐隔籬枱都聞到個蟹粉蝦球勁香，好得！」
Connie：「以咁嘅蟹粉份量，價錢真係幾平，$16隻蟹粉小籠包必食。」
Joey：「蛋白蒸大閘蟹好型仔！花雕俾蛋白蒸勁香，聞到都醉。」
Alan：「原來開始有得食大閘蟹嗱，價錢算OK，平啲更好喇。」
搵食攻略
雲陽閣川菜館（23750800）
地址：尖沙嘴彌敦道132-134號美麗華商場4樓
營業時間：11:30am-3:00pm，5:30pm-11:30pm
座位：120個
最好賣：豆酥桂魚、亁煎雞、蟹粉小籠包、蟹粉酥盒
