有人話，一間公司最重要嘅資產唔係老闆，而係員工，尤其幫公司搵真銀嘅「人才」，咁有咩辦法，可以將搖錢樹縛死，唔畀人挖走？簡單，用番錢囉！就算強如全球最大嘅證券行大摩（摩根士丹利），最近亦使出一招低息借錢畀員工投資基金，加強佢哋嘅歸屬感，而且輸咗唔使還，好爽！
咁個plan係乜？探子回報，大摩首席行政主管麥克，上個月開始推行呢個獎勵計劃，畀一班年薪50萬美金或以上嘅員工（其實即係中高層），將部份花紅投資響大摩旗下對沖基金，員工每出1蚊，大摩額外以低息借出兩蚊畀佢哋，附帶條件係員工三年內不得提取款項，中途離職就喪失所有投資利潤。
其實金融圈一直流傳，大摩出手一向低過金人（高盛集團）同埋雷氏巴打（即係雷曼兄弟）兩個對家，就以今年頭9個月計，每個員工計平均薪酬（連埋津貼之類）大約係20.3萬美金，但金人同雷氏就分別係54.2萬同埋26萬，如果華華係大摩話事人，只可以講，出手一定可以再高啲囉！
講開大摩，佢哋個位星級經濟分析員謝國忠，上星期已經lastday咗，即係享受唔到新福利。中環流傳，老謝轉投另一大行，但佢老哥堅拒透露。老謝有中國通之稱，響大摩為人津津樂道嘅，係警告上海地產即將出現泡沫，呢單嘢令深受買唔起樓嘅大陸同胞對佢敬仰有加。
鯨吞澳門南通
江澤民話齋：「悶聲發大財」係冇錯嘅，正當拉鋸超過兩年嘅廣東發展銀行引進外資股東商討，仲有排未得拍板之際，大摩噚日發新聞稿，通知各位仁兄，話已經買晒中國銀行（3988）澳門分行旗下嘅澳門南通信托投資所持嘅南通銀行股權，而且仲攞埋銀監會嘅「通行證」㖭。
佢哋話，呢單嘢響中行搞上市前已攞出嚟賣，最終畀佢哋爭贏咗，至於使咗幾多錢，就點都唔肯講。
講番南通銀行，佢屬於外資行，已經有晒牌，可以向內地個人及公司，提供外幣同埋人民幣業務，雖然南通嘅客仔，𠵱家主要集中響珠三角，但大摩作為國際大行，眼光梗係唔止望向呢個地區，佢哋全球主席兼首席執行官麥晉椼話，會用呢個平台，為佢哋響全中國嘅國際同埋內地客仔服務。
之不過，零售呢家「揼石仔」業務就咪搞佢喎。咁都係嘅，笛王平日做開嘅，都係有錢人生意，點會有咁好心機理啲細米呀。