做騷唔等於唔務實做嘢，呢句至理名言出自大老闆煲呔，做細嘅豈敢唔遵從？經濟發展及勞工局局長葉澍堃噚日就響應煲呔號召，國慶翌日公眾假期都唔放假，玩完廸士尼再踩入昂坪360，一日走勻兩大旅遊景點撐場造勢。可惜吖，十一黃金周熱潮明顯減退（葉局長都認㗎）；香港仲點樣可以吸引到遊客，真係要靠葉局長發揮小宇宙度一度佢。
噚日葉局長都算做騷做到足，事前準備工夫100分，畀人覺得佢真係有少少誠意，唔係一味去到同市民握手影相走馬看花拍拍籮柚就走人嗰隻。好似佢晨早流流10點去到廸士尼時，就已經畀八方一個驚喜，事關佢真係着住件廸士尼Tee，喺衣着上總算花過心思，跟住仲即場用咗一張紅衫魚買頂帽襯衫㖭。
早前廸士尼一周年生日，政府高官通通缺席；難得葉局長今次肯光臨，廸士尼行政總裁安明智梗係如獲至寶，陪伴在側。咁葉局長都好識做，特別同着住萬聖節衫嘅米奇同米妮影相，仲玩埋「幸會史廸仔」遊戲先鬆人，算係咁喇。
腸胃不適 拒收月餅
離開廸士尼，葉局長立即趕到昂坪360搭吊車。都話葉局長交足功課㗎啦，佢一去到昂坪就用咗178蚊買咗一件衫同帽，仲即時搵地方變身，換上新鮮滾熱辣嘅昂坪衫同帽，難得佢仲自嘲話自己似超人，專業精神認真可嘉。
不過，葉局長形象一向唔算突出，市民對佢嘅認知率向來麻麻，所以噚日好多市民都唔知佢係邊位，好在葉局長都唔係好介意。至於認得佢嘅市民，當然把握機會捉住佢同佢影相留念，葉局長就梗係任影唔嬲，好似大明星咁受歡迎喎，邊個唔想？
沿途唔少商舖老闆話要送禮物畀葉局長，好似和記隆咁，就送咗啲醬料畀佢；有來有往好正常，所以葉局長都用番56蚊買咗兩樽蝦醬當回禮。不過，葉局長就拒收榮華送出嘅月餅，唔係佢大細超，實情係佢近來食得太多，腸胃不適，所以先至唔敢再食月餅住咋。
一班記者跟住葉局長走嚟走去，其實都好辛苦，局長照顧周到，最後請20幾個記者去食魚蛋粉，結果埋單成千幾蚊。呢場真人騷，真係值回票價。