美股道指上周五早段升至11741便躊躇不前，繼續在歷史高位11750之前徘徊，最後回吐39點，收11679。周一晚執筆之時，外圍美股期指下跌14點，道指周一晚或續有回吐，回試10日線11600水平。
踏入10月，股民對「股災」這兩個字更是敏感，近期與有玩開股票的朋友碰面，都被問及10月會否出現股災？
事實上，美、日、港3地股市都有些少高處不勝寒的感覺，道指正挑戰歷史高位；日經指數9月尾跌至250日線15500水平展開的反彈亦面臨阻力，昨收16254，已逼近9月初16415高位；而港股上周一升上17683的6年多高位，距歷史高位不過715點，現時在17500水平徘徊，亦是處於高水平，因此3地股市在10月出現調整的機會頗高，但以基本因素計，恒指預測PE13-14倍左右，不致構成股災，只會正常調整。
其實股市10月偏淡有其先天因素，基金9月季結後，通常鬥快沽貨，然後候低位買回，年底前再推高，便可交出一張靚靚成績表。
揀定P輪等出擊
趙飛雲在9月炒得相當狂，但10月會收斂，倉內用作短炒的股份將見好就收及嚴守止蝕位，同時會揀定幾隻恒指及H指Put輪伺機而動。不過，估計除非有突發利淡消息出現，否則在工行上市前，港股大幅調整的機會不大。同時大市如繼續在17350-17600水平上落，炒輪要注意引伸波幅收窄。
趙飛雲