新力量網絡噚日喺灣仔溫莎公爵大廈搞咗個施政報告研討會，邀請教育界代表講吓香港教育問題。講吓講吓，八方發現台下突然多咗位閃亮亮嘉賓，佢就係公民黨黨魁余若薇。
着住青綠色公民黨黨衫嘅余大狀點解大駕光臨？原來佢本身係參加要求政府設定最低工資大遊行，行到灣仔就順便上嚟捧吓場，事關佢一向好關注教育問題，想聽吓大家有咩意見。佢遇上香港大學教育學院講座教授程介明時仲雞啄唔斷，有共同話題自然好傾啲。雖然好多人對就嚟公布嘅施政報告冇期望，但余大狀依然希望教育方面有喜訊，最想政府唔好將教育問題同成本效益掛鈎，吓吓好似要教育啲人嚟搵錢咁。程介明就講到，政府成日話香港要變成亞洲教育樞紐，但聽嚟聽去都唔知政府究竟想點？睇怕施政報告都要交代吓啩。