中國開放市場，在內地已建立龐大銷售網絡的公司，成為外商覬覦的對象，尋求合作或收購；有一家農業公司，就具備了上述條件，但仍未被發掘出來，佢就係浩倫農業（1073）。
浩倫用4年時間成功轉型建立一套完整的供銷渠道，現時有50間農業超市及逾3000個分銷點，覆蓋面達10個農業大省市。
集團主要在內地經營農藥同肥料的產銷同貿易業務，中國農資貿易產品市場龐大，每年規模達到8000億至1萬億元人民幣，但大多以個體戶形式經營，而以連鎖模式經營則較少，浩倫作為大型農資連鎖商，在市場競爭中佔有極大優勢，並可爭取到更多獨家分銷代理權，把分銷網絡擴大。
浩倫公司雖小（以市值計），但生意好大，05年度（6月結算）營業額16.4億元，升99.6%；06年度上半年，營業額再升117%至10.8億元，中國正大力扶助農業發展，未來兩三年浩倫可以講係食正呢個大浪，由於生意額大，只要利潤率升一兩個巴仙，盈利就有機會翻幾番。
成交異動惹憧憬
集團轉型後，05年度扭轉了連續3年盈利回落的趨勢，獲利2151萬元，純利率只得1.3%，毛利率也不過7%。01及02年，業績最好，每年盈利都約6000萬元，估計06年度盈利可再大增80%至3871萬元，每股盈利9.2仙，以8倍PE計，股價已可升上0.74元。未來一兩年，浩倫盈利仍可保持高增長。
浩倫係冷門股，過去幾個月，每日平均成交只約100萬股，近日成交有異動，上周三就大增到2800多萬股，股價由0.46元升到0.57元。成交走在股價前頭，浩倫突然轉熱，必然有因，唔排除係市場憧憬其業績理想，又或係有外商「睇中」佢嘅因素。仲有，浩倫每股資產淨值約0.80元，現價折讓近30%。
今年2月中，推介浩倫，當時股價0.445元，短短1個月，股價急升上0.71元，升幅近60%，其間成交亦係大增，今次走勢會重演。
郭兆誠