玩咗SnapShot咁多年，開始感覺有啲悶，就算新出嘅DC仔不斷升像素、加拍攝模式都激發唔到我靈感。SONY最近就新返咗兩款具TouchScreen嘅DC；3"屏幕變畫板，影完即畫，隨街攞景、再隨意塗鴉，邊影邊畫，不經意地由中環玩到天后，好玩靈感簡直如泉湧！
記者：陸俊雄
攝影：陳偉強
Model：Sakura
N2的自白
作為一部DC，我揀主人條件唔高，但求唔使我日曬雨淋，得閒帶我出街蒲已經可以。但《蘋果》記者將我交到Sakura呢位女主人手上之後，我心態唔再好似舊時咁諗；佢好識利用我嘅長處，仲慢慢引導我成魔，我開始發現自己同佢一樣，滿身壞女孩嘅邪氣。
當Sakura知道喺我3"芒上可以對相片進行手寫即畫，佢就帶我勇闖中環，做啲平日好想做，但一直唔敢做嘅事。原來佢幻想過好多次，喺立法會大樓牆身盡情塗鴉，寫大字報，今次終於有機會如願以償。雖然係拎住果汁扮噴漆，裝模作樣，影相後大玩事後補畫，但咁玩法，我自己都覺得好High！
其實立法會大樓只係開始，跟住係滙豐總行、新文華、太子大廈一帶名店、IFC、最後仲殺到銅記維園、再踩埋入天后地鐵站，可以畫得嘅地方佢都畫！原來平日行到冇乜感覺嘅地方，都可以令人充滿「幻想」，仲好玩過去廸士尼樂園！
魔女的自白
雖然我叫Sakura，但櫻花都可以好唔文靜，花瓣片片狂夢嗰陣，我就最鍾意。我份人係咁鍾意反建制、搞破壞，所以今次可以中環塗鴉至天后，我好有滿足感！不過，做魔女都要有法器幫手，要有SONY呢部N2引發，我至會咁做。
唔好睇呢部N2外形簡單，千萬像素但掣都唔多個，其實所有按鈕都融化喺輕觸式屏幕入面。影相時大部份嘅調校，如白平衡、感光度、曝光補償，甚至連拍攝環境太暗時用嘅輔助對焦燈，都係透過手寫筆嚟操作。連我呢啲唔慣用新機嘅，都覺得EasyJob。
至於令我魔性大發嘅，當然係即畫功能。畫公仔時，N2有筆嘅粗幼及唔同圖案印章俾你選擇。不過想畫得出神入化都有秘訣，就係事前記緊對芒嘅定位感應作出修正，咁畫起上嚟就唔會出現差少少、唔到位嘅情況。
N2Profile
有效像素︰1,010萬
顯示屏：3"輕觸式TFT
鏡頭：3倍光學變焦蔡司鏡
內置記憶：25MB
記憶卡：MSDuo/PRODuo
體積：96.7×61.1×22.7mm
重量：185g
查詢：SonyStyle(23452966)
同場加映：T系照跟
SONY有另一部輕觸式屏幕DC就係T50。外形似曾相識？的確同9月頭出嗰部T10分別不大，但內涵就更豐富。T50雖得720萬像素，不過功能同上面介紹嘅N2有九成似，仲多咗超防震光學影像穩定器，面對自拍或唔夠光嘅情況，照影可也。此外，雖然T50唔似T10有出粉紅色機，不過都有黑、銀同紅3色選擇；相信有埋繪畫功能，會叫一班追開T系嘅機友大歎︰「點解T50唔早一個月出呀？」
T50Profile
有效像素︰720萬
顯示屏：3"輕觸式TFT
鏡頭：3倍光學變焦蔡司鏡
內置記憶：56MB
記憶卡：MSDuo/PRODuo
體積：95.0×56.5×23.4mm
重量：170g
