喺不同嘅BLOG，不時可以見到版友投票選下心目中至愛或至憎股票，有啲上市公司可以話逢選舉都幾乎必定榜上有名，好似近期喺《香港討論區》度一個「請大家列出心目中的超級劣質股頭5位」投票度，呢種情況同樣出現，結果，本年度最叱咤風雲、仲未知轉唔轉到手嘅8號仔電盈，係39個投票中眾望所歸，脫穎而出成為大家的心中「至愛」!
8號仔點解咁深得人心，投票人就冇乜特別解釋，只係得Wingsuen話：「8號仔係精選中嘅精選，李氏家族都好多入選！」似乎一切盡在不言中......咁8號仔又係咪最最最差個隻呢？可能唔係，因為根據tfanman所講「香港第一衰股：永義國際（1218），佢排第5，都冇公司肯坐頭4位，8號仔拍馬都追唔上......」相信呢句話會令李生好欣慰!
中芯「粉絲」多
至於版友的其他心水，中芯981有唔少「粉絲」，8號仔啲「親戚」長實、和黃同埋長江生命科技都上榜，連「遠房親戚」TOM仔都有份；當然，唔少得有英雄塚之稱嘅8088亞科資本同埋連精武門都救佢唔到嘅2878晶門科技!
討論區亦有講到一啲大家心目中嘅愛股，例如中人壽（2628）同埋蒙牛（2319）！前者呢，網友冇有怕，最怕係個股價俾股評家「神6」網音機報講衰，佢哋話「神6」把口等於死亡筆記，講邊隻死邊隻，佢前幾日話睇14個8，直頭係引起群眾恐慌！而蒙牛就受到好多網友激讚，好似goldenyellow話：「10蚊到配股，𠵱家升到13.3，一個月已有30%利潤……」
w118就話：「Ilovethismilkverytasteful。」stockEasy更明言：「跌少少，畀個位入吓......」唉！忽然諗起原來養牛真係好搵過做電訊啊！