噚日國慶，教統局唔放過呢個機會，搵咗個中層官員，喺佢哋個網頁專欄「局中人語」，整咗篇題為《認識國情．情繫家國．貢獻中華：香港國民教育的路向》嘅文章，大談教統局回歸以嚟，點樣積極推動下一代加深對國家嘅了解，同對國民身份嘅認同，局方仲話推動國民教育嘅原則之一，就係唔能夠「只談兩制，不談一國」，口脗十足領導人。
呢篇由教統局首席教育主任（課程發展）容寶樹寫嘅文章其實無乜新意，因為佢講嗰啲內容同原則，佢哋位常秘羅范椒芬喺幾個月前都講過吓，喺國慶呢個大日子推出好似行貨咗啲。
不過，喺呢個日子，反思吓國民教育都不失係一個合適嘅機會。好似教統局亦都提到，推動國民教育嘅另一個原則，就係唔能夠「只談成就，不談缺失」。
其實，呢排提起愛國，八方諗到嘅人只有一個，就係「中國情意結太深」嘅程翔。