呢個國慶除咗有巨型兔仔燈籠睇，另一個商場鑽石山荷里活廣場亦搞咗個風箏節，展出一隻360吋長嘅全港最大型金魚風箏，都幾壯觀。呢隻風箏整咗成三個月先整好，有五、六個人咁高，造型生動。商場又邀請咗山西風箏師傅曹天寶到場，示範整風箏，並且展出佢珍藏嘅風箏，好似三米闊嘅巨型大鷹風箏，同幾十隻微型風箏咁。
除咗風箏展，商場又邀請咗全港最年輕嘅女變臉大師現場獻技，總之搞到熱熱鬧鬧，好有喜慶嘅氣氛。不過，雖然各大商場都好努力咁出招搶客，但八方始終感覺今年嘅十．一黃金周，市面好似無往年咁旺場，聽講話其中一個原因，係唔少國內同胞改咗去西藏、歐洲呢啲旅遊熱點。