講開國慶酒會，當然不能不提搞手肥平，而一見肥平，自然離唔開個「食」字。噚日喺酒會上肥平一見到八方啲行家，第一時間就推介「會展三寶」──粥、腸粉同豆腐花，仲千叮萬囑班行家一定要試吓。八方有公事在身當然唔可以吞pop，平時識飲識食嘅肥平都竟然「封嘴」，原因係冇胃口喎。
肥平冇解釋點解胃口咁差，不過八方就估可能同佢忙於為讀緊高班嘅囡囡搵小學有關。佢同八方呻，呢單嘢搞到佢頭痛又緊張，雖然口口聲聲話囡囡讀邊間冇所謂，但就爆響口話太太胡慧中安排咗好多嘢畀個女學，以提升競爭力（不過學乜連佢作為老竇都話唔知）。香港教育制度經常被批評，𠵱家連特區高官都身受其害，睇嚟肥平真係要搵李國章傾吓先得。