董落曾上，眨眼間煲呔今年已經係第二年以特首身份出席升旗禮同國慶酒會。上年煲呔一見國旗升起，即時熱淚盈眶嘅場面八方依然記憶猶新，佢份愛國激情，feel唔到都睇到啦！但今年煲呔就唔同晒，一臉輕鬆自在，喺唱國歌嘅時候，仲見佢不時陰陰嘴笑，又大打親民牌，同觀看升旗禮嘅市民逐一握手。咁好笑容，唔知同陳四萬宣布唔玩特首選舉有冇關係？
四萬唔選，等於送咗一份大禮畀煲呔同中央，照道理左派人士應該表揚佢冇搞亂檔。不過，噚日工聯會會長棠哥就好唔客氣話陳太之所以唔選，可能同佢參加完7.1遊行後，發現自己號召力弱咗有關，仲揶揄四萬未選過特首，就一味批評制度唔公平係空口講白話，又指四萬利用過往同政務官嘅良好關係批評政府唔道德，最後仲公開呼籲四萬親自落場參選實踐吓喎。
政治嘅嘢就係咁弔詭，四萬呢排嘅表現，同棠哥呢個講法，唔知係咪叫做以退為進、以進為退？相對棠哥，行政會議召集人梁振英就克制好多，啲記者窮追猛打，係咁追問佢點睇四萬棄選論，但佢老哥好似借咗聾耳陳隻耳咁睬都唔睬吓，之後仲扮聽電話逃避記者追迫。
孫明揚同CS劃清界線
其實，冇咗四萬，得番煲呔同公民黨梁大狀比拼，確實令特首選舉前哨戰變得毫無睇頭。煲呔贏硬當然要全力埋班，其中一個最頭疼嘅就係CS人選。除咗唐唐、鬍鬚曾，同李國章呢幾個熱門外，近日政圈流傳多咗一個名字，就係資歷同煲呔不相伯仲嘅孫公孫明揚。
噚日八方喺國慶酒會見到孫公，當然要恭喜佢成為候選人之一。不過孫公即刻劃清界線，話呢一刻冇人同佢講過、冇啲咁嘅事喎，之後就嗱嗱臨拉埋太太鍾小芬同八和會館主席陳劍聲影相。唔講公事，講吓私事都得啩，孫太同聲姐影完相後，同八方講自己平時好鍾意睇大戲。
講到最欣賞邊位名伶，企喺隔籬嘅孫公就九唔搭八插嘴話，外父最鍾意紅線女，外母就最冧何非凡，最後講到愛妻，孫公就好調皮咁話：「佢就鍾意我囉。」聽到孫太成個冧晒。公開打情罵俏，肉麻就肉麻啲，不過都可以印證到孫公呢排心情真係幾靚。
