蔡依林（Jolin）噚日喺台灣嘅高雄同台中舉行兩場簽唱會，原來前日當Jolin喺台北開簽唱會前，竟有個色情狂喺牛仔褲度攞出生殖器，對住身旁女士自慰至射精，之後當場被人發現，最後報警拉咗佢。
加強保安
一向以性感造型作招徠嘅Jolin聽到後都話自己好驚訝，佢話：「我自己都是今天一早看報紙才知道，的確嚇一跳，希望這個人回家後好好反省，也希望這種傷風敗俗的人不要再在公開場合出現。」Jolin噚日依然施展佢最煞食嘅勁歌熱舞為專輯造勢，而發生咗色情狂事件後，高雄嘅簽唱會都明顯加強咗保安，如果話Jolin真係唔驚嘅話就呃人。
另外，徐若瑄（Vivian）噚日咁啱都喺色情狂事件嘅案發現場度舉行簽唱會，問佢會唔會有陰影，佢就一於冇有怕咁話：「我不怕變態男子，他不理你們穿甚麼衣服，都會有反應的，我姐姐上月穿得好保守去買菜，也一樣遇到變態佬自慰，嚇得她立刻衝進車內，踩油門盡快離開！」
