21歲你做緊乜？發緊夢？第一眼見到瘦瘦削削皮膚白淨嘅阿Ling，點都估唔到佢已經擁有自己嘅餐廳。19歲，贏「香港國際美食大獎」銀獎，當年無人得金獎，阿Ling廚藝可見一斑，早前更有位爸爸帶個仔嚟向佢拜師學藝。講番最初入廚，好多人都叫佢放棄，阿Ling話：「記得學廚時，啲人同我講：『你咁靚，唔使做廚咁辛苦啦。』我無理呀，做廚係前男友鼓勵嘅，雖然佢過咗身，但總算滿足到佢心願。」
前男友已成往事，阿Ling並唔傷心，因為現任男友都好照顧佢：「我一入廚房就好認真乜都好挑剔，佢會間中斟水畀我飲，又幫手執頭執尾，好支持我㗎。」阿Ling從不刻意打扮，即使俾油煙焗到皮膚差亦好少理，夜晚寧願瞓都唔敷Mask，仲一臉素顏穿梭廚房同客人之間，「有時啲客都會口花花讚我靚女，呢個時候男友就會呷醋，不過都係講笑啫，我諗佢唔會嬲嘅。」男友大方真難得，下次幫襯唔好掛住同阿Ling吹水，記得試佢手勢呀。
記者：黃若茵 攝影：楊錦文
意大利茄茸芝士焗羊架$158
用ＢＢ羊去做焗羊架，肉質更嫩，羊羶味亦唔會太重。羊架用百里香同欖油醃過，食到陣陣香草味。
迷你雲吞配墨魚汁$78
迷你雲吞喺意大利入口，細細粒可以一啖吞落肚，而且煮起嚟更易入味。
牛油果蟹肉沙律$58
用東涌藍蟹，蟹味好鮮甜。個汁就用咗牛油果、刁草去做，好清香。
食客評分（5分滿分）
Chu'sCuisine（29881323）
地址：東涌道上嶺皮村9A地下
