窩輪成交額愈來愈大，上星期一（九月二十五日）突破一百億元，佔港交所是日成交額近三分一，原因之一係中國人壽、中國移動呢啲一級國企股嘅股價波幅大，一日之內買Call買Put都有機會賺錢，股民有乜辦法唔大炒特炒。
以前唔少散戶博二三線細價股，𠵱家窩輪興旺，買藍籌窩輪只有價格風險，冇乜管治風險，更冇公司倒閉，銀行斬倉風險，如果買二三四線股，就乜嘢風險都有齊，你話買邊樣嘞。
既然窩輪成交暢旺，大銀行嘅衍生工具部專家特別風騷。上星期公關大姐大請左丁山搭順風車，去到長江中心停車場攞車，上車坐低，大姐大想開車之際，一架波子就喺前面衝過，大姐大話：「呢度有好多波子，開車好快。」係噃，由車位駛到上出口，一分鐘內真係見到十幾架波子停在車位。長江中心寫字樓有大銀行在，如高盛、德銀。銀行𠵱家咁好賺，揸波子返工，一啲都唔奇。
分析Ｗ嘅老公在碼頭工作，話今年每水船到港，都見有波子新車到港，最近一水船，有十幾架，相信好好賣。分析Ｗ話：「鬼唔係咩，我時時見到年輕賓架在中環揸新波子試車，分到花紅咪買番架嚟獎勵自己囉。」
好景之時不妨想番吓上次股災，科網狂潮爆破之後，華爾街大量traders失業，鬥快賣波子，由downtown銀行轉到mid-town餐廳兼職做侍應。最弊係一啲著名高價大餐廳平時嘅最佳、最豪氣客人就係華爾街賓架，佢哋失業之後，餐廳生意少晒，失業賓架想捧餐都唔易。最近睇金融時報，知道瑞信（CreditSuisse）投資銀行部發出通知，要求啲賓架唔好猛咁請客，唔好用彩色影印機（見客做presentation除外），領取文具要次數少啲，總之一言以蔽之：慳慳慳！正當旺市之時，何以瑞信在細眉細眼支出上，發出要求節儉通知？用意好明顯，居安思危，做定心理準備，等跌市時，唔好措手不及而已。