噚日係中國57周年國慶，響香港好多唔同地區都有舉行盛大嘅慶祝儀式，之不過我哋嘅財爺唐英年，就特別鍾意安排自己名下嘅愛駒響國慶日上陣，帶同屋企人一齊入馬場幫手打氣，而唐唐嘅手風又出奇咁順，連續兩年都可以拉頭馬慶祝國慶，真係唔到你唔服！
八方記得去年嘅國慶日賽馬，唐唐名下隻「富士晨曦」咁啱贏咗出嚟，噚日歷史重演，佢名下另一匹馬「心福」，喺尾場以次熱門身份贏馬，賽後見唐唐好開心咁帶住太太同埋仔仔，仲有立法會秘書長馮載祥齊齊落凱旋門拉頭馬兼影番張威水相，事後唐唐話自己隻馬能夠響國慶日贏馬，當然會覺得特別開心，之不過好可惜上季贏馬嗰隻「富士晨曦」，早輪因為腳部受傷而需要做手術，𠵱家仲休息緊，佢話希望「富士晨曦」遲吓可以復出，再贏番場頭馬咁就最好不過。