利物浦門將連拿又孭鑊！連拿繼早前喺英超聯輸球甩手波畀愛華頓後，上周六作客對住保頓，先被旁證誤判禁區外犯手球，之後對方中場史必勁射，連拿又好似守12碼咁捉路，俾史必射入，咁搞法真係隨時正選不保。連拿今季表現「騰雞」，聯賽只有兩場唔失波，難怪「news.twonil.com.hk」網友一仔都話：「好心畀番杜廸克打正選啦！」
控球走位有板有眼
不過連拿唔守龍門可以打咩位，睇番連拿之前喺利物浦今季季前熱身賽對凱沙羅頓時，就串演過前鋒；球迷想重溫連拿打前鋒，就可以瀏覽名為《Reina》短片；其實嗰陣已經係比賽最後幾分鐘，連拿就披上14號球衣登場，講真控球、走位都算有板有眼，不過一次接應隊友左路傳中，禁區頂「空晒」抽射，結果好似平時開龍門球咁，抽到9樓咁高。
呢位光頭佬保唔保到正選門將位仲係後話，不過呢次誤判手球，都引起本地球迷一輪討論，喺足球留言區「news.twonil.com.hk」，網友巴士阿仔表示：「唔知點解，佢場場有搞笑嘢，今次仲要俾人老屈，好心唔好出佢啦。」不過就有球迷力撐利物浦，網友tony就話利物浦被針對，他說：「保頓半場嗰邊旁證兩、三次利記明明無越位都吹，利記半場嗰邊旁證就盲嘅，人哋連拿明明喺禁區度隻手已經放走咗個波，咁都有得吹仲俾保頓入埋。」
hitrate985次