採訪黎巴嫩餐廳，膽怯！我連黎巴嫩喺邊都未知！上網搵料做功課，發現黎巴嫩位於中東，唔少菜式都用上鷹嘴豆（又稱雞心豆）。講開鷹嘴豆就巴閉囉，日本考古學家證實到中東出土嘅鷹嘴豆係世界上最古老豆類，雖然唔係乜嘢貴價食物，但過癮在食完呢餐你可以同朋友仔拋書包嘛。
記者：黃若茵
攝影：何家亮
模特兒：Gloria（UMovie）
黎巴嫩菜健康天然
入黎巴嫩餐廳「Maronche」，老闆Sharma係黎巴嫩人，典型中東人Look，中午時間好繁忙，佢一臉笑容招呼客人，「之前我喺中環一間中東餐廳做嘢，但換咗老闆後唔係好夾，決定自己開間黎巴嫩餐廳。」黎巴嫩菜同中東菜有乜唔同？「兩者分別好細，不過黎巴嫩傳統菜式落較多香料。」香料用得多唔代表辣喎，用香而不辣嚟形容就最啱。「黎巴嫩菜好健康㗎，主要用蔬菜、橄欖油等，符合健康飲食之道。」黎巴嫩菜最常用嘅食材當然唔少得有一萬年歷史嘅鷹嘴豆，喺香港，呢種材料唔易搵，「雖然大陸都有出產鷹嘴豆，但味道好唔同，我哋嘅鷹嘴豆香好多。」為攞靚貨，每三日一次空運到港，成本唔低，但食物唔算好貴，呢餐異地菜抵食呀。
1.Hommos$60
黎巴嫩傳統菜式，中間係鷹嘴豆，旁邊係加咗芝麻膏同檸檬汁嘅鷹嘴豆茸，好Creamy但較鹹，記得跟黎巴嫩麵包一齊食。
2.ShawarmaLamb$155
中東傳統烤法串燒羊肉，肉香汁多，同洋葱、Parsley一齊夾喺黎巴嫩烤麵包裏面，每啖都好Full，配埋自製蒜茸醬超正。
3.Falafel$70
賣相勁似肉丸，其實係用蔬菜做嘅，將鷹嘴豆、蠶豆等多種素食磨茸再搓成丸狀，大大粒鹹鹹哋，口味特別。
4.Tabbouleh$80
Parsley呢隻香草多數作調味之用，但呢個沙律竟然成碟都係Parsley，加入少少番茄同鮮薄荷，入口有極香濃香草味。
5.Soujok$75
Homemade牛肉腸，除咗牛肉，香腸內仲加有帶辣味嘅香料，所以食落有少許辣，但香味唔難入口。
食客有say
搵食攻略
Maronche（25418282）
地址：中環閣麟街48號
營業時間：星期一至四12:00nn-2:00am，星期五至日12:00nn-5:00am
交通：中環地鐵站D出口
全店座位：48個
人均消費：$150
最好賣：Hommos
